Bald isch Wahl....

Es send no a paar Tage, nau isch dr Wahltag dau,
a jeder schtellt dia Frage, wer soll’s Vertraua hau?
Ja jetzt reisad d’Kandidata recht eifrig umanand
berichtad von deana Tata dia sia em Getto hand.

A jeder ka’s no besser und woiß wo’s lang gau duat,
wetzt geg’s da andra s’Messer mit sichtlich guatem Muat.
Jeder kennt dia Bagatelle wo all’s an Stillschtand hat,
und woiß glei auf dia Schnelle au no da rechta Rat.

So wia en Krumbach hana gad es fascht üb’rall zua,
und der, der isch jetzt dana kriagt an Kritik grad g’nua.
Bloß wo kandidiert dr alte als oiz’ger Kandidat,
hat all’z au guat verwalta und so s’Vertrau hat.

Doch des mit deam Vertraua so in dia Politik,
net viele deant drauf baua, bloß weanig hand a G’schick.
Üb’rall wed so viel verschprocha und was ma alles duat,
kennad mit Wasser au bloß kocha, vielleicht mit meah an Muat.

Doch es soll Wähler geaba, dia wählad aus Protescht
mit Absicht au dr’neaba zu aller guater letzscht.
Und dia andre land es bleiba weil es nix bringa dät,
und deant de Falsche na nau treiba dass nau glei alles d’schpät.

Doch wer net gad zum Wähla hat nauche nix zum saa,
duat eahn no was so quäla, des muass er schlucka naa.