Nach 170 Jahren wieder an Bär

Mir Menscha moinad scho, mir send über alles erhaba, mir müssad alles des was unser Herrgott erschaffa hat vernichta, wenn es uns net en Kram passt. Der Braunbär hat Tiere g’rissa, so wia es halt sei Inschtinkt nach Hunger war. Ganz sicher hat er es net aus Luscht und Laune doa. Send mir Menscha so manchem Tier wirklich überlega? Hand mir wirklich mehr Hirn? Des könnt ma scho oft bezweifla!

Alles des was in unserer Natur g’schieht, alles des wird von uns manipuliert, weil mir Menscha ja sooooo g’scheit sind, so schlau und allem andra überlega. Mir müssad überall eig’reifa, fühlad uns als Herrgott, bloß mir wissad was uns guat duat, was unserer Natur guat duat. Doch hand mir uns scho mal wirklich dr’mit beschäftigt und eig’seah dass sich in dr Natur alles von ganz alloi reglad? Wiaviel Völker ohne unsre Zivilisation kommad denn hervorragend z’recht, au ohne Schtrom, ohne Auto, ohne Media – Komfort? Aber mir dau, mir in dr Zivilisation müssad dau au eigreifa und deane Völker des zoiga was mir hand, fraugad net amal ob dia des hau wend. Bloß weil dia leaba dent wia unsre Urahna in dr Schteinzeit muass es deane doch no lang net schlecht ganga. Oins isch sicher, dia tötad ganz sicher net aus Schpaß und aus Luscht, so wia der Braunbär au net. Dia kämpfad auf a ganz natürlicha Art ums überleaba. Sicher, mir au, aber auf a ganz unnatürlicha Art.

Wer sich a bissle mit dr Natur beschäftigt, der woiß dass sich dau wirklich alles selber regeneriert. Ganz ohne unsra Hilfe, dia se eigentlich wirklich net braucht. Im Busch, im Dschungl, in dr Wildnis, dau gibt es nix überzüchtetes, dia Fisch em Wasser, was hättad dia für a scheanes Leaba wenn mir Menscha uns net eimischa dädat. Aber mir Menscha müssad entscheida wer auf unserm Planeta leaba derf und wer net, mir wissad wer harmlos und wer g’fährlich isch, doch isch des g’fährlichschte Lebewesen auf der Erde net dr Mensch? Send net mir selber unser gröschter Feind? Oder hat a Tier scho ma aus Habgier getötet? D’Natur braucht uns beschtimmt net, aber mir brauchad sia, bloß ob mir des je mal begreifa deant!