Managergehaltserhöhung contra Rentenerhöhung

Ja ma muass se net beneida, dia Herra Manager, wia hart dia sich doch ihra Geld verdiena müssad. Wenn dr Tag 48 Schtund hätt, nau dädat se 48 Schtund schaffa, so könnad se eaba bloß 24 Schtund für d’Firma dau sei.
Heb mal, wann schlaufad nau dia eigentlich????
Ja, es send scho arme Kerle, wenn man des so sieht, dau verdeant ma em Jauhr zwischa 3,5 und 11,5 Milliona Euro, schaffad dr’für Tag und Nacht und hat koi Zeit des Geld auszumgeaba. Denn wia ma heart und all liest, Urlaub könnad sia sich bei deam Job fascht koin leichta. Na ja, und wenn se g’schäftlich in dr Welt rum fahra und fliaga müssad, des zahlt ja au d’Firma, au des Auto, des se Tag für Tag nutza deant. Und für provates bleibt dau ja gar koi Zeit net.

Aber vielleicht hand nau d’Fraua von deane Herra Manager ebbes dr’vo. Immerhin hand se ja von deane Männer nix, weil se ja allaweil schaffa deant, auswärts zum Essa und in G’sellschafta eig’lada warrad. Manchmal vielleicht sogar mir Anhang, des wird aber nau vielleicht d’Sekretärin sei, ma ka ja nia wissa wia ma dia dau braucha könnt.....
Ja ja, ma muass se scho bedaura, dia Herra. Jetzt hat ma durch harte Arbeit 18,7 % meahr Gewinn erwirtschaftad als letschtes Jauhr und was kriagt ma, grad mal a bissle über 16 % meahr Gehalt.
Vielleicht sollt ma fer dia Herra doch a mal sammla gau......

Dau hat es doch so a Rentner richtig guat. Der braucht koine 24 Schtund am Tag schaffa, braucht koine 18 % meahr Gewinn vom Voarjauhr erwirtschafta und kriagt trotzdeam no 0,5 % meahr Rente. Isch des net a feiner Zug von unserer Politik???
Na ja, und unser Schtaat hat ja au meahr erwirtschaftad. Und a Politiker schaffad ja au 24 Schtund am Tag, däts 48 wenn er könnt, und beschtimmt müssad dia Diäta au bald meahr angepasst werda. Deam gad’s ja grad so wia ma Manager, bloß das er net so viel Geld verdeant, weil er net so viel G’winn erwirtschaftad eaba wia dia in dr freia Wirtschaft.

Des hat wohl d’Frau Doktr Gaby Pauli jetzt au raus kriagt. Hat se net no voar a paar Monat g’sait, ja felsafescht behauptad, sia bleibt ihrem Landkreis Fürth als Landrätin treu und kandidiert wieder??? Jetzt will se doch nemme, warum au allawei, aber di8a hat wohl da Brauta g’rocha, mit ihrem Verschtand und Dickkopf, bewiesa hats es ja und da Schtoiber abg’sägt, ka ma in dr freia Wirtschaft viel weiter komma. Klar, als Minischterpräsidentin kommt se net na, dia Krone kriagt se net, aber wer woiß wo andra Milliona Jahresgehälter auf sia wartad. Sicher hat se a guats Angebot kriagt.

Ja dau müssad unsre Politiker au bloß no heula, weil se ja au so weanig verdeana deant, und weil se ja au so viel schaffa müssad. Und jetzt woiß ma au warum dia Merkl heit scho so alt aussieht als wia se en dr Rente wäre....ihr fehlt halt au dr Schönheitsschlaf....!!!! Ja mei, wenn ma dia ganz Zeit in dr Welt rumfliaga muass, wo soll ma denn dau schlaufa könna??? Und des ohne männliche Liebe dr’zua, dia au no an wenga schea macha dät. Fer des und dia Arbad, ja, dau isch se beschtimmt mit ihre paar Kröta Diäta unterbezahlt.....

Hat es dau a Rentner net schea, kriagt sei Geld und braucht dr’für nix doa. Ka, wenn er will da ganza Tag sei’m Schönheitsschlaf nauch ganga, hat Zeit sei Geld auszumgeaba, derf sich sei Auto aussuacha, des er fahra will und muass koi Dinschtkarosse fahra. Ka zum Essa ganga und derf des au no selber zahla, oder au mal dahoi bekocha lassa. Er muass auf koine G’sellschafta ganga und mit Leit schwätza dia ma eigentlich gar net ma, und kriagt sogar no 0,5 % Rentaerhöhung.......

I muass jetzt aufheara zum schreiba, mir kommad glei Träna, so muass i unsre Groaßverdiener, Manager und Politiker bedaura......... Vielleicht sollt ma doch mal sammal gau fer dia.......?????