Ehrenamt nicht wert Steuerbegünstigt zu werden

Ma könnt des ganz oifach mal hochrechna was des koschta dät wenn a Kommune zum Beischpiel koi Freiwilliga Feuerwehr meahr hätt. Da dia ja für da Brandschutz zuschtändig isch müsst a Pflichtfeuerwehr her. Ma ka also Männer wia Fraua zwischa deam 18. und 60. Lebensjahr zum Feuerwehrdienscht verpflichte. Aber dia müsstad zahlt werra.

Jetzt nimm mer mal a kloina Schtadt wia Krumbach. Damit dr Brandschutz gewährleischtad isch wärad a mal so um dia 60 Mann (und Frau) ausreichend. Um mit de Gerätschafta umgau zum könna muass g’übt werra, g’lernt werra und dau nimm mer mal im Jauhr rund 50 Schtunda a. Denn kommad Einsätz dr’zua, rund 180 dürft dr Durchschnitt sei, dr’vo sind beschtimmt dann 100 net zum berechna. Des wärad dann runde 250 Schtund dr’zua.

Nimm mer mal an Schtundaloah von 20 Euro, was für d’Freizeitopfra net hoch ang’setzt isch. Wenn ma des jetzt mal zammarechnet und wenn i mi net verrechnad hau, dann sind des rund 275.000 Euro im Jauhr an Koschta. Und des für a Kloischtadt mit rund 12.000 Einwohner. Und wiaviel solcher Schtädt hand mir???

Wenn es also dia Ehraämter net geaba dät, dann wärad des für da Schtaat zig Milliarda Euro dia auf eahn zuakomma dädat. D’Feuerwehr isch ja bloß ois, andere Hilfsorganisationa, Vereine in Kircha, und, und, und….. Alle dia sich für des öffentliche Wohl da Arsch aufreißad sind für unsre Parteia und Regierunga so guat wia nix wert.

Soll oim dau net dr Gaul durchganga wenn man sieht wia dia Gelder anderscht verschleudrad werrad? Soll oim dau net dr Kraga platza wenn ma sieht wia fei sich dia Dama und Herra Politiker des Amt und des Leaba machad??? Dia alle solltad ma in dr Sch….. hocka und koiner sich dau der se freiwillig in seiner Freizeit raus ziaht, vielleicht dät dr oi oder andre mal umdenka anfanga….