Beckstein bald Bayern’s Kaiser???

Es isch jetzt dann endlich so weit, ma kriagt an neua Minischterpaäsident und der schtellt dann wieder sei neues Kabinett zamma. Bei manche schtrahlad wohl d’Auga dass der Tag bald kommt und andre wieder warrad a wenig skeptisch drei gucka. Na ja, wenn ma sich voarschtellt, welcher normale Arbeiter wird denn mit 63 no befördrad? Befördrad ja, allerdings zum alta Eisa und g’wieß net mit Gehaltserhöhung. Aber es muass ja au a Unterschied dau sei.....

Beschtimmt nimmt dr Beckschtein dann nimmer so viele Schpata in d’Hand und eröffnad an nuia Bauabschnitt. Wahrscheinlich kriagt er a nuia Axscht zum a Rundumschlag in Sache transparenter Bürger, zwecks dr Sicherheit natürlich. So ka auf jeden Fall a jeder von deane Herra gucka ob aus ma brava bayerischa Erdabürger a Lump worra isch. Aber eaba ja nur zu unserer oigena Sicherheit.

Es wird also am 9. Oktober g’wählt, unser neues Landesoberhaupt. Und des aber ganz sicher ganz demokratisch vom oigena Haufa. G’fraugat wird dau von uns koiner ob mir dean überhaupt wollad. An Heinrich Wörle kennt i mir au ganz guat vorschtella an dean Poschta. Als Kabinettsbilder dann da Bauer Willi, denn der beherrscht des super, was ma ja am tierischa G – 8 scho g’seah hat. Und i denk dass dau a ganz guata Mannschaft zamma g’hem.

Wieser mal wird aber über unsre Köpf hinweg entschieda wer uns regiera derf. Vielleicht hättad mir ja dia ganz erotisch wirkende Pauli Gaby bevorzugt? Dua will ja eh nimmer als Landrätin kandidiera. Mir kriagad bloß wieder des was dia auskartad hand und so kommt dr Beckschtoi au in dr Pensio scho wieder a Schtufe nach oba. Was mir dr’bei immer wieder auffällt, in dr freia Wirtschaft werrad bloß ganz junge Leit mit langer Erfahrung g’suacht, in dr Politik kommad bloß alte Hasa zum Zug dia des Wort E§rfahrung gar net g’kennad......