„Mehr Zeit zu Leben“......

...isch a neues Thema im deutscha Fernsehn. Doch um mehr Zeit zu Leben zum hau fehlt im Moment immer no Zeit. Denn ma muass sich halt des Geld verdeana um meah zum Leaba zum hau. Sicher gad es in deam Thema mehr um länger leaba zum könna, älter zum werda. Und scho isch des erschte Thema glei wieder dia Finanzierung von de Alte. Denn Alte koschtad Geld, Rente, dia junge zahla müssad und fer manche send dia 1,1 % Erhöhung scho zu viel.

A Thema ohne Ende und alle schwätzad am eitgentlicha Problem eigentlich vorbei. Dr oi oder andre schtemmt zwar des Liad mal a, aber sengt es halt net zu Ende. Jeder schwätzt von deam Aufschwung, der bei uns au a’komma soll, doch moint es wohl au net wirklich so. Denn ma müsst dau halt ebbes ändra, und ma hackt sich halt selber ungeara d’Auga aus. Und so reitad alle bloß auf em toata Gaul umanand ohne es zum merka.

Ma fraugt sich en dr Politik, wo soll ma’s denn her nemma? Aus dr Wirtschaft, oder von de Reiche, vielleicht aus dr Politik? Vielleicht sollad Pensiona von Politiker auf verschteurad werra? Aber dia alle wehrad sich immens dr’gega. Also geit es bloß oins, ma muass es dau holla wo koi Gegawind zum erwarta isch. Und des isch au glei no dia Masse und brengt am moischta. Dr schtink normale Bürger und Rentner soll zahla.

Ma rechnad uns all meah voar was bloß a billiga Rentaerhöhung koscht, koi Mensch schwätzt dr’vo was die Erhöhung dr Pensiona von Politiker, ja scho gar net deane Diätaerhöhunga. Wenn ma dau rechna dät, was ma dau alles finanziera könnt? Was könnt ma alles dr’mit zahla wenn es au dau Mindestgehälter und Mindestpensiona gäb? Aber über so etwas machad sich koine Regierunga Gedanka, warum au!

Mehr Zeit um Leben hätt a jeder geara, bloß no seine Hobbys nauch ganga. Grad au bei de Fraua, dia ja geara an Einkaufsbumml macha dätad. Ma dät dau a wenga meah Geld ausgeaba und so dr Wirtschaft ebbes guates doa, und au dr Arbeitslosigkeit. Es gäb all no meah Aufschwung dadurch. Doch es gad halt net, denn wo ma nix hat ka ma nix ausgea. Des schafft ma bloß beim Schtaat. So nemmt ma halt meah Zeit zum Leaba auf koschtengünschtige Art und schpart.

So lang dia Inflation immer meah schteigt, dia Teuerungsrate um 3% schtändig schteigt, d’Lebensmittl und d’Energie heit scho meah koscht wia umg’rechnad in D-Mark, aber immer no d’hälfte vom Loah kriagt, ka ebbes halt net passa. Aber vielleicht isch es bei uns oifach scho so geprägt bloß negativ zum denka, wo doch d’Frau Merkel woiß das jetzt au dr Aufschwung Deutschland au bei uns a’komma isch. Und dia muass es ja wissa.........

Nau han mir ja meah Zeit zu Leaba!