Silvester | Ewald Eden | Wilhelmshaven
Tiedensfroagen …
Een heelet Joahr mit siene Doagen,
dat is nu Mörgen allwäär Güstern -
ikk much mi foaken sülven froagen,
ween dat nu Broers, ov ween dat Süstern.
Moal leepen see in d’ Sönndachskleed,
een annermoal in scheddrich Büksen -
moal deen see su, as harn see freet
un leeten dat Vergnöögen bliksen.
Moal ballerdn see mit’n Scheetgewehr
up allens wat sükk röögen de -
moal blaarden see vull Haartenssäär
over Frünndens Blood in witten Schnee.
Moal seeten see an vulle Dischen,
moal keek de Schmacht ut leege Doagen -
moal danzden see up grööne Wischen
un hevvt toglieks de Welt beloagen.
Ikk hevv mien Frää nu mit hör schloaten,
pakk see in de Vergäätensschuuv -
hevv noch een lüütji Troan vergoaten,
hier in mien stillen Schrieverstuuv.
ewaldeden©
Bürgerreporter:in:Ewald Eden aus Wilhelmshaven |
6 Kommentare
Sie möchten kommentieren?
Sie möchten zur Diskussion beitragen? Melden Sie sich an, um Kommentare zu verfassen.