Ei Gude wie? Mir is was bassiert, des muß isch Eusch erzähle. Isch wollt ja mit maam Mann zusamme es Kinnerzimmer streische. Abber wie Männer nun emal sin mußte mers verschiebe. Erst hadder die Gripp, dann hadders im Ricke,
ärschendwann wurds mer zu bund un isch hab alaans aagefange. Isch wollt erstemal für unsern Bub die Wand hinnerm Bett streische. Abber da fings scho a. Mir hadde kaan grie, also hab isch aagefange zu mische. Erstemal abissi weiß, damit`s net zu dungel wärd, dann e bissi blau druff un zuletz geel. Naja, des mußt isch öfter widderhole, bisses e schee Fab wurd. Habs zum Glick aach an de Wand probiert! Hab nämlisch net draa gedacht, das es da annersder wärd. Also nochemal von vorn, nur das isch middem Fön nachgeholfe hab, schließlisch wollt isch feddisch wern. Was en Schlamassel. Mei weiß war all, aber in de Gerage stand noch en Aamer. Den hab isch geholt, aber dann gesehje, das die Fab tiefgefrorn war! Des kimmt devo wenn ma am käldeste Daach emal schnell was mäscht! Abber isch wußt mer zu helfe un hab im Waschbecke heiß Wasser eilaufelasse, de Aamer eringestellt un hab mit de a Hand die Farb middem Fön uffgetaut, midde Anner umgerührt, dadebei vor misch hie geschennt un geguckt, das isch net klegger un hab uff de Klang vom Fön geacht, damit er net heißlääft. Mulditasking ebe. Abber es is feddisch un jetz hat maan Klaane sogar a Scheinstruckdurdabeet, grie mit weiße Dubbe, weil net all Fabteilscher richdisch uffgetaut sin. Adschö Euer aal Hex
Bürgerreporter:in:Sally Bergner aus Obertshausen |
Kommentare
Sie möchten kommentieren?
Sie möchten zur Diskussion beitragen? Melden Sie sich an, um Kommentare zu verfassen.