"Politiker", der Job

Ma fraugt sich in dr heitiga Zeit
Wo es denn am moischta Geld geit,
Wo d’Arbad oin net grad recht schafft,
Fer’s Hobby hasch au no a Kraft.

Und wichtig isch au Pensio
Dia allawei kriasch au no so,
Ob grad ebbes g’leischtad, ob net,
Ob ebbes au nei zahlt hasch g’hett.

Wo au no mit fünfzig was bisch,
Mit sechzig a ganz groaßer Fisch,
Mit siebzig wirsch allwei no braucht,
Mit achtzig bisch lang no net g’schtraucht.

Und wichtig isch dau ja no au,
Das net vermisst wirsch, bisch net dau,
Fer Fehler koi Verantwortung hasch,
In jedem Fall a Einser Pasch.

A Auto, des oim wett au g’schtellt,
A Flieager fer di au no b’schtellt,
A jede Reise dienschtlich isch,
Wia’s Essa, des schtad auf em Tisch.

Wo kenna ma braucht net recht viel,
Koi Schtudium s’schualische Ziel,
Bloß schwätza was ma dir auf schreibt,
das Träna dir in d’Auga treibt.

I han mi darüber schlau g’macht
Wo so ebbes kriagsch über Nacht,
Wo’s gleich isch ob Frau oder Ma
Und wo au a Haucka wär dra.

Gehörigkeit, erschtes Gebot,
Nau isch alles weitre im Lot,
Bloß denka derfsch selber halt net,
Nau isch fer an Aufschtieg nia d’schpät.

Wo ka’s denn so ebbes no gea,
Koi Firma ka sich des leischta heit meah,
Han i g‘fraugt und ma hat mir g’sait
Das des a so wirklich au geit.

Politiker muasch du dau sei,
Dr oizig Job wo was brengt ei,
vielleicht au als Manager no,
Aber des isch au scho des Gro.

Denn dia suachad allawei Leit
Wo’s fehlt grad mit der Ehrlichkeit,
Wo’s Liaga de längschte Fiaß hat,
Muasch selber fer nix schtanda grad.

So war’s und wird’s allwei sei,
komm in dia groaß Politik nei,
hasch ausg’sorgt fer a Leaba lang,
em Leaba wird’s dir niemals bang.