Harburger Müllabfuhr "Gedicht" 1.02.1962 in der Donauwörther Zeitung
Bei os do hoißt ma d`Wörnitz, Wenz,
en dera schwemma geara Gäns
ond en dr schöana Sommerszeit
do schwemma in dr Wenz o Leit,
dia neba Gäns und neba Enta
Erholung in deam Wasser fenda.
Ond eppas, was no d`Hauptsach isch -
en dr Wenz, do schwemma Fisch...
Schleia, Karpfa, Hecht ond Zander
schwemma denna omanander.
Barma, Doanaheckl, Brachsa,
Aitla, Aal od Nasa wachsa
en dr Wenz ond Tremmer Weller
mit Köpf so groaß wia Suppateller.
Neba Leit, Fisch, Enta, Gäns,
schwemmt no meaner en dr Wenz,
was i euch geara verrot...
Alte Büchsa, Häfa, Droht,
Eise, Blech ond Fahrradspoicha,
Motorrad- ond o Autoroifa,
Schnaps-, Bier-, Wei- und Millichflascha,
alte Kuffer, alte Tascha,
jonge Hond ond jonge Katra,
Fedra von Sprungmatratza,
manchmal o a verreckta Sau,
Parfümfläschla, roat, grea ond blau,
Herings- ond Konservadosa
ond hia ond tag so braune Soßa,
Seit dia Gail stets wera wenger
sieht ma Roßbolla fascht nemmer,
Alles ka ma fascht net saga,
was se en dr Wenz tuat bada.
Ja, d`Wenz dia hot an guata Maga
ond ka allerhand vertraga.
Em Johr amol, meischtens em Lenz,
do werds narrat, oser Wenz,
ond tuat auf oimol fürchtig trutza
ond bäumt se auf ond tuat se putza...
Nocht schwemmts da ganza alta Plonder
ganz weit na en Doana nonter.
I glob, ma ka scho fascht glei saga,
daß na roicht bis zu de Schlawaka.
Scho mancher hot fei scho do donta
von Horburg a Adenka gfonda.
Wann nocher alles furt isch gsegelt,
isch`z Horburg d`Müllabfuhr o wieder gregelt.
Mit dem Aktivieren des Buttons erlauben Sie einen begrenzten Datenaustausch mit Facebook. Mehr dazu rechts unter .