D`r Prozeß
"Hey Petrus!" schreit der liabe Gott,
"Was tuat denn heunt so brenzla?
Hosch ebba du a Milch verschütt´?
Tua me nor net lang hänsla!"
"Des kommt von dunt", sagt Petrus drauf,
"I tua`s gar lang scho gschpüra;
Woiß net, warum dia in der Höll
So teufelsmäße schüra."
"Fahr `na", sagt Gott zum Petrus glei
"Und übergib des Schreiba!
Des übermäße Schüra muaß
Von heunt a unterbleiba!"
Dia Botschaft tuat da Teufel scho
Ganz höllmäße fuchsa;
Er rollt sei Oga, fletscht sei Zähn
Und tuat wia Holzkatz pfuchsa:
"Zum keita Posa tua ne jatz
Mei Seeale ärger quäla.
Sag nur deim Alta: "In der Höll
hot er an Dreck z`befehla!"
"Isch oh recht", sagt der Himmlisch Herr,
"O dia Red no in Eahra,
Doch muaß a nuia Fuiermau`r
Von dene aufgführt weara!"
Do isch der Petrus wia der Wind
Glei wieder auf seim Poschta
Und sagt: "A nuia Fuiermau`r
Muaß hear of uire Koschta!"
Doch Teufel schreia alle z´samm
Und teant nor höhnisch lacha:
"Weil ons nor arme Teufel sind,
Dromm lommer o nix macha!"
Voll Omouat klagt der liebe Gott:
"Do hilft koi Dischpatiara;
Im muaß halt no zu guater Letzscht
Mit´m Teufel prozessiera."
"Des wär nix dumms", fährt Petrus drei`,
"Do täscht dein oigna Schada;
Os hont im ganza Hemel ja
koin gozia Akvakata!
G. Jakob aus "Allerlei"1893
Mit dem Aktivieren des Buttons erlauben Sie einen begrenzten Datenaustausch mit Facebook. Mehr dazu rechts unter .