Wenn´s Chrischtkendle kommt

Wenn´s Chrischtkendle kommt

Scho wiedr isch a´ Johr vorbei
ond Weihnacht vor dr Diar.
Chrischtkendle kommt en´s Herzle nei,
i´ wünsch es kommt zu Dir.

Es soll Dr all dean Friada brenga,
dean brauchsch auf dera Welt.
Ond tausad Engl sollan singa,
dass Friede ons erhellt.

Isch Chrischtkend en Deim Herzle denna
brengt Dir Glickseeligkeit.
Gib ruah ond dua de recht besenna,
zu schnell vrgoht dia Zeit.

Schau doch mol zruck auf all dia Johr,
denk an dia scheana Zeita.
No, kommt´s auf oimol dir so vor,
Gott isch an deinr Seita.

So kurz jetzt vor am Weihnachtsfescht,
halt en dir selbr still.
Es bleibt vom Leaba blos da Rescht,
so wias dr Herrgott will.

Doch sollsch dr macha koine Sorga,
Dein Gram vergiss ganz schnell.
Frei Di an hait denk net an morga,
leicht wia a´ Stern so hell.

Des kloina liabe Chischtuskend,
em Herzle duas feschtheba.
Vrgoht dia Zeit au no so gschwend,
brengt´s Froahsenn in Dei Leaba.


© Dieter Elmer