Groaßkopfade

Nervt dees Eich oh, dass Alls auf am Buckl von de Kloine ausdraga weard?
Auf de Alte ond de Kranke nemmt ma koi Ricksicht mehr ond will dass ma dees Gschmoiß bald los isch. Abr warum se krank wora senn, dees sigt ond intressiert koin.
Vielleicht kahs sei, dass se durch d´Arbat kränkle senn, weils an Lebdaglang blos allawei bucklad ham, damits na em Altr a´mol bessr goht?
Doch von all deam, isch weit gfehlt.

GROASSKOPFADE

Scho wieder ham`r dean Salat,
a Saustall isch bei ons em Staat.
I frog me was hot ma do gwählt,
wia goht ma om mit onsram Geld?
Schulda hot mr en Billiona,
doch schmeißt ma rom mit de Milliona.
Zwickt weard allwei bei de Kloina,
Untrstützung griagt ma koina.
Hauptsach isch ma kommt guad ah,
schliesle isch ma sau guad dra.
Bei de Groaße, dees scho stimmt,
weil mahs von de Kloine nimmt.
So zoigt ma dr ganza Welt,
dass recht guat om ons bestellt.
Weil dia Groaße hond koi Gwissa,
weard dr Kloine allwei bschissa.
Fiar d´ Regierung nur das Beschte,
doch dr Kloine isch dees Letschte.
Dees billig Zuig kah dear doch fressa,
hott Er koi Geld, muaß Abfall essa.
Dees Duire kah ma se nett leischta,
vom Geld, honn Groaße blos am moischta.
Fiard d´ Arme bleibt dr Gruscht,
noch ebbas Guadam hott´r Gluscht.
So frisst dr kloine Ma dr Dreck,
dass Er recht bald darauf verreck.
No braucht ma zahla oh koi Rente,
ond die Regierung reibt dia Hände.
Fiar dia duat se so ebbas lohna,
weil dodurch steigand dia Pensiona.
Drzua no, weard dia Diät erhöht,
dass de Groaße bessr geht.
Om Großkopfade isch guad bestellt,
dia leaband guad mit onsram Geld.
Wia dia mit onsram Geld rumschmeißa,
do drauf kah ma an Haufa scheißa.
Machts weitr so mit Politik,
bei nächschter Wahl griagts alls meah zrick.

© D.Elmer