Auszug aus meinem Buch "A bsondra Freid mit Schwobaleit"

Käsmichl untrweags

Da ich in der "Schwabmünchner Allgemeine" jeden Samstag" als "Käsmichl" unter Menschen und Meinungen schreibe und zeichne, habe ich diesen Titel augewählt.

Ich wünsch Euch viel Spass beim Lesen!

I bin a Käsmichl

Es isch scho allweil, dees mei,
a´Stickle Käs, ganz bsondrscht fei.
Ob fescht ob woich, es isch egal,
fiar mi isch´s all, a´ defftigs Mahl.

Aufgschnitta, odr ganz am Stick,
mit Essig, Eal ond mit Musik.
Mei Weib, ka dees gar it v´rstau,
wenn i an Käs, em Kiahlschrank hau.

Weil oft, hot der an starka Duft,
a´ strengs Aroma, en dr Luft.
Dees isch fiar mi, zom herzerwoicha,
an guada Käs, auf´s Brot naufstreicha.

Es macht mir, iebrhaupt nix aus
ond stinkt dr Käs, em ganza Haus.
Fiar d´ Nies, isch dees a´ Wohlbefenda,
Earscht wenn dr Käs, duat richtig steanka.

Mit Pfeffr, Paprika ond Salz
do kasch blos saga, Gott erhalt´s.
Erhalt ons doch, dia Landwirtschaft
an haufa Kiah, mit sehr viel Saft.

Mit groaße Eutr, fiar de Mille
dees hoff i mir, en aller Stille.
Damit´s an Käs gibt, alle Zeit
fiar´d Spätzla, was mi bsondrscht gfreit.

Auf dia Spagetti ond auf Pizza,
earscht mit am Käs, duat´s richtig sitza.
An Käs mit roadam ,blaua Schimml
dees isch fiar mi, dr Kääsehimml.

Ond isch´r warm, fangt ah zom loffa
no weard dr Käs, ganz oifach gsoffa.
Wenn der se ziagt, no isch grad recht
weil i an Käs, auf´d Nudla mächt.

En Frankreich gibt´s an guate Brie,
fiar so an Käs, mach i mi hie.
A jeda Sorte, friß i nei,
i breicht drhoim, a Käserei.

Ob Backstoikäs, ob Romadur
a´ Harzer- Rolle, friß i pur.
Ob Tillsit, oder Emmental
woher der kommt, isch mir egal.

I kenn dr Brauch, der Appenzellr
drum friß i Käs, mit samt am Tellr.
Ob Schofskäs, aus am Griachanland
fiar Käs do braucht ma, scho Verstand.

I will koin Käs, des isch ganz gwieß
des isch dr Käs von meine Fiaß.
Doch wenn i oinscht, mol beiß en´s Gräsle,
am liabschta, wär mir scho a´ Käsle

© D.Elmer

1